Toshkent shahar bojxona boshqarmasi matbuot xizmati xabariga ko‘ra, 2025 yil 26 iyul kuni poytaxtdagi bojxona boshqarmasi xodimlari o‘rtasida kibersport bo‘yicha musobaqalar boshlandi. Bu haqida Upl.uz xabar berdi.
Musobaqalar asosan yosh xodimlar orasida o‘tkazilmoqda. Ushbu tadbir yoshlarga bo‘sh vaqtlarini mazmunli va samarali o‘tkazishga ko‘maklashish, sog‘lom turmush tarzini targ‘ib qilish, axborot texnologiyalariga bo‘lgan qiziqishni oshirish hamda jamoaviy ruh va sog‘lom raqobatni mustahkamlash maqsadida tashkil etildi.
Musobaqalarda o‘yin sifatida dunyo bo‘yicha 20 yildan ortiq vaqt davomida mashhur bo‘lib kelayotgan Counter-Strike 1.6 tanlandi. Ushbu o‘yin jamoaviy ruhni rivojlantirish va umumiy g‘alabaga erishish uchun zarur bo‘lgan muvofiqlashtirilgan harakatlarni shakllantirishga yordam beradi.
Musobaqalarda ishtirok etayotgan xodimlar o‘zlarining mahorat va strategik fikrlash qobiliyatlarini namoyish etmoqda. Bu kabi tadbirlar yosh mutaxassislarning jamoaviy ishlash ko‘nikmalarini oshirish hamda ularni zamonaviy texnologiyalar sohasiga yanada qiziqtirishda muhim ahamiyatga ega.
