Toshkentda piyodalar o‘tish joylarida aqlli robotlar o‘rnatilishi mumkin bo‘lib, ular videokameralar yordamida yo‘l harakati qoidalarining buzilishlarini, shu jumladan haydovchilar va piyodalar tomonidan qilinadigan qoidabuzarliklarni qayd etadi. Bu haqida Upl.uz xabar berdi.
Quyida keltirilgan videodan ko‘rinib turibdiki, maxsus robotlar shu yilning o‘zida xizmatga kirishishi mumkin. Ma’lum qilinishicha, robotlar avtomatik ravishda quyidagi qoidabuzarliklarni aniqlaydi: qizil chiroqda o‘tish, haydovchining piyodani o‘tishini to‘xtatmasligi va yo‘lni belgilangan joydan o‘tmaslik.
Ushbu chora-tadbirlar yo‘l harakati intizomini oshirishga va piyodalar xavfsizligini ta’minlashga qaratilgan. Agar loyiha amalga oshirilsa, har bir qoidabuzar, haydovchi yoki piyoda bo‘lishidan qat’i nazar, aqlli kuzatuv tizimining nazoratida bo‘ladi.
Bu esa yo‘l harakati madaniyatini yaxshilash va yo‘l-transport hodisalarini kamaytirishga xizmat qiladi.
