Toshkent aholisiga yaqin orada yuz berishi mumkin bo‘lgan geomagnit bezovtaliklarga tayyorlanish tavsiya etiladi. Bu haqida Upl.uz xabar berdi.
Meteonova meteorologik xizmatining ma’lumotlariga ko‘ra, 27 iyul yakshanba kuni poytaxtda to‘rt balli magnit bo‘roni kutilmoqda. Ushbu magnit bo‘ronning cho‘qqisi soat 17:00 atrofida kuzatiladi va so‘ngra geomagnit faollik taxminan 20:00 ga yaqin sekinlashadi.
Magnit bo‘ronlar Quyoshda yuz beradigan murakkab jarayonlar natijasida paydo bo‘ladi. Ular Quyoshning yuzasidagi kuchli portlashlar va quyosh massasining chiqarilishidan kelib chiqadi.
Bu hodisalar natijasida zaryadlangan zarralar va energiya oqimlari barcha yo‘nalishlarda, shu jumladan Yerga ham yetib boradi. Ushbu oqimlar Yerning magnitosferasi bilan o‘zaro ta’sirga kirishib, geomagnit bezovtaliklarni yuzaga keltiradi.
To‘rt balli magnit bo‘ron o‘rtacha darajada hisoblanadi, biroq bunday bezovtaliklar ham meteorologik holatga sezgir odamlar sog‘lig‘iga ta’sir qilishi mumkin. Magnit maydon o‘zgarishlariga sezgir shaxslar bosh og‘rig‘i, bosh aylanishi, yurak urishining tezlashishi, uyqu buzilishi, umumiy holsizlik va bezovtalikni his qilishlari mumkin.
Ayniqsa yurak-qon tomir va asab tizimining surunkali kasalliklariga chalingan bemorlar sog‘lig‘iga alohida e’tibor berishlari lozim. Ushbu davrda o‘z sog‘lig‘ingizga ehtiyotkorlik bilan yondashing.
