Raqobatni rivojlantirish va iste’molchilar huquqlarini himoya qilish qo‘mitasi matbuot xizmatida rasmiy bayonot e’lon qilindi. Bu haqida Upl.uz xabar berdi.
Qo‘mita tomonidan “UzAuto Motors” aksiyadorlik jamiyati dilerlari bilan tuzilgan avtomobil sotish shartnomalari o‘rganilib, O‘zbekiston qonunchiligiga zid bo‘lgan bandlar aniqlangan. Shu asosda, “UzAuto Motors” vakillari bilan hamkorlikda ushbu shartnomalarga o‘zgartirishlar kiritildi.
Xususan, to‘lovlarni qaytarish muddati 30 kundan 10 kungacha qisqartirildi. Sotuvchi majburiyatlari bo‘limidan ishlab chiqarish vaqtincha to‘xtatilganda, yetkazib berish muddatini 45 kungacha uzaytirish mumkinligi haqidagi band olib tashlandi va u majburiyatlar bo‘limidan “fors-major” bo‘limiga ko‘chirildi.
Bundan tashqari, bir yil ichida bir xil avtomobil modeliga qayta shartnoma tuzilgan taqdirda, yetkazib berish muddatini 120 kungacha uzaytirish haqida band shartnomadan to‘liq chiqarib tashlandi. Shuningdek, endi shartnomada sotuvchining O‘zbekiston qonunlariga muvofiq majburiyatlari aniq belgilangan.
Bu o‘zgarishlar mijozlar manfaatlarini himoya qilish va shartnoma shaffofligini oshirishga qaratilgan.
