Toshkentda o‘tkazilishi rejalashtirilgan rossiyalik-isroillik yozuvchi Dina Rubinaning adabiy kechasi uchun chiptalar sotilishi to‘xtatildi. Bu haqida Upl.uz xabar berdi.
Bu qaror uning G‘aza haqida aytgan so‘zlari sababli yuzaga kelgan jamoatchilik shov-shuvi ortidan qabul qilindi. Tadbir 10 oktyabr kuni Turkiston saroyida bo‘lib o‘tishi kutilgan edi, biroq iTicket.uz saytidagi onlayn chipta sotuvlari to‘xtatildi, shuningdek, afisha.uz saytida e’lon qilingan ma’lumotlar o‘chirildi.
Mavzuga sabab bo‘lgan holat «Dozhd» telekanali tomonidan e’lon qilingan intervyu edi. Jurnalist Mixail Kozyrevning iddaosiga ko‘ra, Rubina Isroil G‘azadagi aholini kislota bilan yo‘q qilish huquqiga ega degan gaplarni aytgan.
Ushbu so‘zlar efirga uzatilmagan, ammo keyinchalik alohida ko‘rinishda tarqatilib, keng norozilik uyg‘otgan. Rubina o‘z so‘zlari kontekstdan chiqarib olinganini ta’kidladi, jurnalist esa e’lon uchun uzr so‘radi.
Intervyuning to‘liq matni e’lon qilinmadi va telekanal bu vaziyat bo‘yicha izoh bermadi. Eslatib o‘tamiz, yozuvchi Toshkentda tug‘ilgan, 1990 yildan buyon Isroilda istiqomat qilmoqda.
