Surxondaryo viloyati IIB matbuot xizmati xabariga ko‘ra, ijtimoiy tarmoqlarda bir nechta ichki ishlar xodimlari aybsiz qariyaga nisbatan zo‘rlik qo‘llayotgani haqida video tarqaldi. Bu haqida Upl.uz xabar berdi.
Biroq, bu ma’lumot turli blogerlar tomonidan o‘zlarini mashhur qilish maqsadida tarqatilgani aniqlandi. Haqiqatan ham, 2024 yil 22 iyul kuni Baysun tumani dehqon bozorida profilaktika inspektorlari jamoat joyida shovqin ko‘targan mast holatdagi qariyani tinchlantirishga harakat qilishgan.
Ushbu shaxs ichki ishlar xodimlarining qonuniy talablariga bo‘ysunmay, faol qarshilik ko‘rsatgan. Keyinchalik uni mashinaga o‘tirg‘izib, narkologiya bo‘limiga olib borishgan va u yerda alkogol ta’siri ostida ekanligi tasdiqlangan.
Baysun tumanining jinoyat ishlari bo‘yicha sudi tomonidan ushbu qariyaning ma’muriy huquqbuzarlik holatlari ko‘rib chiqilgan. U “Mayda bezorilik” hamda “Ichki ishlar xodimining qonuniy talablarini bajarmaslik” moddalari bo‘yicha aybdor deb topilgan va unga uch baza hisoblash miqdorida, ya’ni 1 125 000 so‘m jarima solingan.
