Andijon viloyati ichki ishlar boshqarmasi matbuot xizmatida ijtimoiy tarmoqlarda tarqalgan ma’lumotlarga izoh berildi. Bu haqida Upl.uz xabar berdi.
Ijtimoiy tarmoqlarda Andijon viloyatida bolalarni o‘g‘irlashda gumon qilingan fuqaro qo‘lga olingani haqida xabarlar tarqaldi. Biroq, mazkur holat bolalarni o‘g‘irlash bilan bog‘liq emasligi aniqlangan va tarqatilgan ma’lumotlar yolg‘on ekani ma’lum qilindi.
Ichki ishlar boshqarmasining ma’lumotiga ko‘ra, 31 iyul kuni soat taxminan 15:40da Shahrixon tumanidagi "Chuzha" mahallasida yashovchi fuqaro qisqa raqam "102"ga qo‘ng‘iroq qilib, noma’lum ayol uyning ichiga kirgani haqida xabar bergan. Holat yuzasidan inspektor voqea joyiga yuborilgan.
Voqea joyiga yetib kelgan xodimlar noma’lum ayolning ruhiy kasallik bilan og‘riganligi va 1986 yilda tug‘ilgani, Shahrixon tumani "Buston" mahallasida yashashi aniqlanganini bildirgan. Ushbu fuqaro 2019 yildan buyon tibbiy nazoratda turadi.
Shu kuni ayol Andijon viloyat psixonevrologiya dispanseriga davolanish uchun yuborilgan. Mazkur holat bo‘yicha boshqa tarqalgan ma’lumotlar noto‘g‘ri hisoblanadi va ishonchsizdir.
Ichki ishlar boshqarmasi aholidan faqat rasmiy manbalarga tayanishni so‘raydi.
