Toshkentda shifokorlar 2 yoshli qizchaning qornidan 135 ta magnit sharcha chiqarib oldi

Toshkentdagi Respublika shoshilinch tibbiy yordam ilmiy markazida 2 yoshli qizchaning qornidan 135 ta magnit sharcha olib tashlandi. Ushbu holat Sog‘liqni saqlash vazirligi matbuot xizmati tomonidan tasdiqlandi.

Ma’lum bo‘lishicha, qizaloq magnit sharchalar bilan o‘ynayotgan paytda ularni ichiga yutgan. Bir necha vaqt o‘tgach, sharchalar qornida to‘planib, bolaning hayoti xavf ostida qolgan. Ota-onasi zudlik bilan Farg‘ona viloyatidagi Respublika shoshilinch tibbiy yordam markaziga murojaat qilgan. Tekshiruvlar davomida magnitlar bolaning qornida yig‘ilib qolganini aniqlashgan.

Avvaliga shifokorlar konservativ usulda davolash yo‘liga o‘tib, qayt qildirish orqali 14 ta sharchani chiqarib olishdi. Ammo asosiy qismi ichkarida qolgan. Keyinchalik qizcha Toshkentga olib kelingan va shoshilinch jarrohlik amaliyoti o‘tkazilgan.

Operatsiya davomida, 4,5 soatlik mashaqqatli jarayonda, tajribali shifokorlar – professor Habibulla Oqilov, Nozim O‘rmonov va Dilmurod Sabirov tomonidan qizchaning qornidan 135 ta magnit sharcha chiqarib olindi.

Sog‘liqni saqlash vazirligi ma’lumotiga ko‘ra, qizchaning ahvoli qoniqarli va u shifokorlar nazorati ostida o‘zini yaxshi his qilmoqda.