Toshkent shahar Favqulodda vaziyatlar boshqarmasi matbuot xizmatidan ma’lum qilinishicha, 2024 yil 5 avgust kuni soat 12:50 atrofida "Spark" rusumli avtomashina yong‘ini haqida xabar kelib tushgan. Bu haqida Upl.uz xabar berdi.
Hodisa Mirobod tumani Nukus ko‘chasida sodir bo‘lgan. Voqea joyiga yetib borgan yong‘in-qutqaruv xizmatlari xodimlari tezkor harakat qilib, soat 13:06 da avtomashinani o‘chirishga muvaffaq bo‘lishgan.
Yong‘in natijasida avtomobilning deyarli butun qismi vayron bo‘lgan. Yong‘in sababli hech kim jarohat olmagan.
Dastlabki ma’lumotlarga ko‘ra, avtomashina motor qismida qisqa tutashuv yuzaga kelgan va aynan shu holat yong‘inning boshlanishiga olib kelgan. Hozirda yong‘inning aniq sabablari o‘rganilmoqda.
Favqulodda vaziyatlar boshqarmasi aholiga xavfsizlik qoidalariga qat’iy rioya qilishni eslatadi hamda yong‘inlarning oldini olish bo‘yicha choralarga e’tibor qaratishni tavsiya etadi.
