Toshkent shahar bosh boshqarmasi matbuot xizmatida qurol sifatida ishlatilishi mumkin bo‘lgan taqiqlangan buyumlarni ushlash bo‘yicha statistik ma’lumotlar e’lon qilindi. Bu haqida Upl.uz xabar berdi.
Ma’lum qilinishicha, 21 kun davomida Toshkent shahrida “TIG” nomli profilaktik tadbir o‘tkazilgan. Tadbir davomida piyodalar va avtomobil haydovchilari shaxsiy tekshiruvdan o‘tkazilgan.
Fuqarolar taqiqlangan, sovuq qurol sifatida ishlatilishi mumkin bo‘lgan buyumlar bor-yo‘qligi bo‘yicha tekshiruvdan o‘tkazilgan. Natijada jami 1631 nafar huquqbuzar aniqlandi va ulardan jami 1715 xil taqiqlangan buyumlar musodara qilindi.
Xususan, 1614 pichoq, 17 kastet, 19 tayoq, 7 pnevmatik qurol, 2 elektrosokator va boshqa buyumlar topildi. Boshqarmada ta’kidlanishicha, bunday buyumlarni olib yurish ma’muriy javobgarlikni keltirib chiqaradi.
Jarima miqdori 1 dan 5 bazaviy hisoblash miqdorigacha bo‘lib, bu 412 000 dan 2 060 000 so‘mga teng. Fuqarolardan qonuniy talab va cheklovlarga rioya qilishlari so‘raladi.
