Toshkent viloyati IIBB YHXB matbuot xizmati xabariga ko‘ra, Bekobod tumanida qidiruvda bo‘lgan shaxs qo‘lga olindi. Bu haqida Upl.uz xabar berdi.
Yo‘l harakati xavfsizligi xodimlari tomonidan “Xavfsiz va sog‘lom mamlakat” profilaktika tadbirlari doirasida tumanda 1993 yilda tug‘ilgan piyoda to‘xtatildi. Ushbu shaxs yo‘l harakati qoidalarini buzganligi aniqlangan.
Shaxs aniqlanganda, uning qidiruvda ekani ma’lum bo‘ldi. Toshkent viloyati prokuraturasi tomonidan ushbu shaxsga nisbatan O‘zbekiston Respublikasining Jinoyat kodeksining “Soliqlar yoki majburiy to‘lovlardan qochish” moddasi bo‘yicha jinoyat ishi qo‘zg‘atilgan.
Ushbu jinoyat uchun eng yuqori jazo besh yilgacha ozodlikdan mahrum qilishni o‘z ichiga oladi. Qidiruvdagi fuqaro ushlangan va Bekobod tumani IIBga olib ketilgan.
Hozirda tergov harakatlari olib borilmoqda.
