Namangan viloyati IIB matbuot xizmati tomonidan ma’lum qilinishicha, firibgar shaxs aniqlangan. Bu haqida Upl.uz xabar berdi.
Uychi tumani IIBga 1988 yilda tug‘ilgan, Uychi tumanidagi “Shifokor” mahallasida yashovchi fuqaro murojaat qilgan. U aytishicha, 2025 yil 26 aprel va 8 may kunlari orasida onasining bank kartasidan jami 5 953 000 so‘m mablag‘ o‘g‘irlangan.
O‘tkazilgan tergov harakatlari natijasida ushbu jinoyatga Toshkent shahar Shayxontohur tumanidagi “Beltepa” mahallasida yashovchi, 1983 yilda tug‘ilgan shaxs aloqadorligi aniqlangan. Jinoyatchi jabrlanuvchining ishonchini qozonib, uning bank kartasi ma’lumotlari hamda SMS orqali kelgan maxfiy kodni aldov yo‘li bilan qo‘lga kiritgan.
Mazkur holat bo‘yicha O‘zbekiston Respublikasi Jinoyat kodeksining 168-moddasining 3-qismi bilan jinoiy ish qo‘zg‘atilgan. Firibgarga 8 yilgacha ozodlikdan mahrum qilish jazosi qo‘llanilishi mumkin.
Tergov davom etmoqda.
