Toshkent viloyati IIBB Yo‘l harakati xavfsizligi boshqarmasi matbuot xizmati xabariga ko‘ra, qidiruvda bo‘lgan shaxs ushlangan. Bu haqida Upl.uz xabar berdi.
Toshkent viloyatida Yo‘l harakati xavfsizligi inspektorlari tomonidan 1992 yilda tug‘ilgan fuqaro tungi paytda yo‘llarda maqsadsiz harakatlanayotgani aniqlanib, to‘xtatildi. Shaxsning shaxsiyati tekshirildi va uning tergov organlaridan yashirinib, qidiruvga berilgani ma’lum bo‘ldi.
Ushbu shaxsga nisbatan O‘zbekiston Respublikasi Jinoyat kodeksining 168-moddasi 4-qismi — firibgarlik bo‘yicha jinoyat ishi qo‘zg‘atilgan bo‘lib, unga nisbatan 10 yilgacha ozodlikdan mahrum qilish jazosi belgilanishi mumkin. Ushbu holat yuzasidan zarur hujjatlar rasmiylashtirildi.
Qidiruvdagi shaxs ushlab, hududiy ichki ishlar bo‘limiga olib borildi. Tez orada unga nisbatan tergov jarayoni qayta boshlanadi.
