O‘zbekistonda gematologik va onkogematologik kasalliklardan aziyat chekayotgan bemorlarni dori-darmonlar bilan uzluksiz ta’minlash darajasi 80 foizga yetishi mumkin. Bu haqida Upl.uz xabar berdi.
Bu haqda prezident farmoni loyihasida ta’kidlangan bo‘lib, loyiha bo‘yicha jamoatchilik muhokamasi 19 avgustga qadar davom etadi. Hujjat 2025–2030 yillarga mo‘ljallangan tibbiy yordamni rivojlantirishning asosiy maqsadlarini belgilaydi.
Asosiy maqsadlar quyidagilardan iborat. Kasalliklarni erta aniqlash darajasi 60 foizgacha oshiriladi va diagnostika muddati 6 kungacha qisqartiriladi.
Maxsus tibbiy yordam ko‘rsatish qamrovi 100 foizga yetkaziladi, davolash boshlanishi esa tashxis qo‘yilganidan keyin 10–14 kun ichida amalga oshiriladi. Bemorlarning besh yillik omon qolish ko‘rsatkichi 55 foizga, bir yillik omon qolish ko‘rsatkichi esa 34 foizdan 60 foizga oshishi kutilmoqda.
Hujayra banki tashkil etilishi natijasida gemopoyetik suyak iligi hujayralarini transplantatsiya qilish muddati tashxis qo‘yilganidan so‘ng olti oydan uch oygacha qisqaradi. Shuningdek, qon banki yaratiladi, bu esa bemorlarni zarur qon komponentlari bilan bir kun ichida ta’minlash imkonini beradi.
Eslatib o‘tamiz, ilgari O‘zbekiston va Qozog‘iston sog‘liqni saqlash vazirliklari bolalar onkologiyasi sohasida akademik markaz yaratish bo‘yicha kelishuvga erishgan edi.
