O‘zbekistonda ta’lim tashkilotlari uchun yangi davlat akkreditatsiyasi tartibi tasdiqlandi. Bu haqida Upl.uz xabar berdi.
Ushbu tartib o‘rta maxsus, oliy va qo‘shimcha ta’lim muassasalariga taalluqlidir. Hukumat qaroriga muvofiq, yangi tartib mamlakatdagi ta’lim sifatini oshirishga qaratilgan.
Akkreditatsiya jarayoni to‘rtta asosiy bosqichdan iborat bo‘ladi. Birinchidan, ariza berish va ro‘yxatdan o‘tish amalga oshiriladi.
Ikkinchidan, ta’lim dasturlarining ichki sifat nazorati o‘tkaziladi. Uchinchi bosqichda tashqi baholash bajariladi.
To‘rtinchidan esa yakuniy qaror qabul qilinadi. Davlat akkreditatsiyasi uchun arizalar har yili 1 oktabrdan 31 yanvargacha qabul qilinadi.
Ta’lim muassasalari ariza bilan birga litsenziya va ro‘yxatdan o‘tish guvohnomasi nusxalari, davlat bojini to‘laganligini tasdiqlovchi hujjat hamda akkreditatsiya uchun mas’ul xodimning ma’lumotlarini taqdim etishi lozim. Arizalar ko‘rib chiqilishi 15 ish kunigacha davom etadi.
Agar qaror ijobiy bo‘lsa, ta’lim muassasasiga akkreditatsiya guvohnomasi bir hafta ichida beriladi.
