Farg‘ona viloyatida Ichki ishlar boshqarmasi Qo‘riqlash bo‘limi xodimi, kichik serjant Sherzod Odilov jasorat ko‘rsatib, cho‘kib ketayotgan qiz hayotini qutqardi. Bu haqida Upl.uz xabar berdi.
Hodisa 6 avgust kuni soat 13:00 larda Rishton tumanidagi Zodiyon qishlog‘i hududida sodir bo‘ldi. Bu haqda Farg‘ona viloyati IIB matbuot xizmati ma’lum qildi.
Katta Farg‘ona kanalining suvida o‘z kuchi bilan chiqib keta olmayotgan insonni ko‘rib, Sherzod Odilov darhol yordamga shoshildi. U qizni suvdan chiqarib olib, unga birinchi tibbiy yordam ko‘rsatdi.
Uning tezkor va jasoratli harakatlari tufayli jiddiy falokatning oldi olindi. Keyinchalik aniqlanishicha, jabrlanuvchi 2004 yilda tug‘ilgan ayol bo‘lib, ehtiyotsizlik oqibatida kanalga tushib ketgan.
Hozirda u tuman tibbiyot muassasasida shifokorlar nazorati ostida bo‘lib, hayotiga xavf yo‘q. Bu voqea hamkasblar va fuqarolar uchun jasorat va mas’uliyat namunasi bo‘lib xizmat qilmoqda.
