2025 yilning 22 va 23 avgust kunlari Toshkent viloyatining Parkent tumanidagi Zarkent qishlog‘ida an’anaviy “Uzum sayli” festivali o‘tkaziladi. Bu haqida Upl.uz xabar berdi.
Ushbu yillik tadbir uzumchilikni ommalashtirish, qishloq xo‘jaligi sohasidagi yutuqlarni namoyish etish hamda milliy an’analarni qo‘llab-quvvatlash maqsadida tashkil etiladi. Festivalga qishloq xo‘jaligi vakillari, xalq hunarmandchiligi ustalari, madaniyat arboblari hamda mamlakatimizning turli hududlaridan ko‘plab mehmonlar kelishi kutilmoqda.
Festival dasturi juda boy va qiziqarli bo‘lib, unda uzum va boshqa qishloq xo‘jaligi mahsulotlari yarmarkasi, yangi agrar texnologiyalarni taqdim etadigan ilmiy-amaliy konferensiyalar, konsert va madaniy tadbirlar, shuningdek, milliy urf-odatlar, hunarmandchilik hamda gastronomiya namoyishlari o‘tkaziladi. Parkent vodiysi uzoq yillardan beri uzumchilik bilan mashhur bo‘lib, ushbu festival ishtirokchilarga tajriba almashish, mintaqaviy turizmni rivojlantirish va fermer xo‘jaliklarini qo‘llab-quvvatlash imkonini beradi.
Tadbirga kirish bepul bo‘lib, Toshkentdan keladigan mehmonlar uchun bepul avtobuslar tashkil etiladi.
