Farg‘ona viloyatida ichki ishlar xodimi katta Farg‘ona kanaliga tushib ketgan bir qizni qutqarishga muvaffaq bo‘ldi. Bu haqida Upl.uz xabar berdi.
Bu haqda viloyat ichki ishlar boshqarmasi matbuot xizmati ma’lum qildi. Hodisa 2025 yil 6 avgust kuni sodir bo‘lgan.
Navbahor mahallasida yashovchi Kodirov ismli fuqaro 102 raqamiga qo‘ng‘iroq qilib, Qushtepa tumanidagi Xujakishlok mahallasidan oqib o‘tuvchi kanalda bir qiz cho‘kib ketayotganini xabar qilgan. Shundan so‘ng, tuman ichki ishlar bo‘limi profilaktika inspektori kapitan Odiljon Ahmadov voqea joyiga darhol yetib bordi.
Kapitan Ahmadov va hodisaga guvoh bo‘lgan shaxs birgalikda 17 yoshli qizni suvdan chiqarib oldi. Qizga birinchi tibbiy yordam ko‘rsatildi va tez tibbiy yordam xodimlariga topshirildi.
Hozirda qiz shifoxonaga yotqizilgan bo‘lib, uning hayoti xavf ostida emas. Ushbu holat ichki ishlar organlari xodimlarining tezkor va malakali harakatlari natijasida inson hayotini saqlab qolish mumkinligini yana bir bor isbotladi.
