O‘zbekiston Respublikasi Prezidenti Shavkat Mirziyoyev raisligida o‘tkazilgan oliy ta’lim muassasalari bitiruvchilarining bandligini ta’minlash masalalariga bag‘ishlangan kengaytirilgan yig‘ilishda yangi tashabbus e’lon qilindi. Bu haqida Upl.uz xabar berdi.
Endilikda, agar abituriyent beshta tanlagan oliy ta’lim muassasasidan birortasiga ham qabul qilinmasa, ammo uning ballari boshqa ta’lim muassasasidagi bo‘sh qoldirilgan yo‘nalishga mos kelsa, rektor uni shartnoma asosida qabul qilish imkoniyatiga ega bo‘ladi. Ushbu chora davlat va xususiy oliy ta’lim muassasalari o‘rtasida raqobatni rivojlantirishga xizmat qiladi.
Shuningdek, bir qator masalalar oliy ta’lim muassasalari rahbarlarining mustaqil yuritishiga topshiriladi. Ular ta’lim yo‘nalishi va tayyorlov darajasiga qarab “super” shartnoma narxlarini mustaqil belgilash huquqiga ega bo‘ladilar.
Bu o‘quv jarayonini samarali tashkil etish va sifatli ta’limni ta’minlash uchun muhim qadam hisoblanadi. Yangi tartib oliy ta’lim tizimida shaffoflik va raqobatbardoshlikni oshirishga xizmat qiladi.
