7 avgust kuni Toshkentdagi “Bunyodkor” stadionida o‘tkazilgan Jennifer Lopes konserti stadion maydoniga salbiy ta’sir ko‘rsatdi. Bu haqida Upl.uz xabar berdi.
“Championat.asia” nashrining xabar berishicha, futbol maydoni jiddiy zararga uchragan. Mutaxassislarning fikriga ko‘ra, bunday tadbirlardan so‘ng maydonni avvalgi holatga keltirish odatda 6-8 hafta vaqt oladi.
Tez orada stadionda maydonni yangilash ishlari boshlanadi. Bu holat Jennifer Lopesning yirik konsertlari sport maydonlariga salbiy ta’sir ko‘rsatishi bo‘yicha birinchi holat emas.
Oldinroq Yerevanda ham shunday vaziyat yuzaga kelgan edi. U yerda konsertdan so‘ng Respublika stadionining maydoni futbol o‘yinlari uchun yaroqsiz holga kelgandi.
Endi e’tibor Qozog‘istonning Olmaota shahriga qaratilgan. 10 avgust kuni u yerda ham Jennifer Lopesning konserti o‘tkaziladi.
Qozog‘iston markaziy stadionining maydoni konsertdan keyin zararsiz qoladimi yoki yo‘qmi, vaqt ko‘rsatadi. Ushbu voqea sport infratuzilmasining yirik tadbirlar ta’siriga chidamliligini qayta ko‘rsatmoqda.
Stadion maydonlarini saqlash va tiklash masalalari jiddiy e’tibor talab qiladi.
