Ichki ishlar vazirligi Yo‘l harakati xavfsizligi bosh boshqarmasi matbuot xizmati ma’lum qilishicha, bola ota-onalariga nisbatan chora ko‘rilgan. Bu haqida Upl.uz xabar berdi.
2025 yil 30 iyul kuni ijtimoiy tarmoqlarda yuk mashinasi va samosval yarim pritsepi boshqaruvida maktab o‘quvchisi bo‘lgan voyaga yetmagan shaxsning tasviri tarqaldi. Ushbu holat yo‘l harakati ishtirokchilari uchun jiddiy xavf tug‘dirishi mumkinligi sababli keng jamoatchilikda norozilik uyg‘otdi.
Ichki ishlar organlari tomonidan o‘tkazilgan tergov natijasida voqea Qashqadaryo viloyatining Qarshi tumanida sodir bo‘lgani aniqlangan. Bola va uning ota-onalari bilan kelajakda shunday holatlarning oldini olish bo‘yicha tushuntirish ishlari olib borildi.
Hozirda voqea yuzasidan dastlabki tekshiruv davom etmoqda va tekshiruv yakuniga ko‘ra ota-onalarning harakatlariga qonuniy baho beriladi. Yuk mashinasi jarima maydonchasiga joylashtirilgan.
