Transport vazirligi matbuot xizmatidan ma’lum qilinishicha, hozirgi vaqtda vazirlik yo‘lovchilarni tashish xizmatlari sifatini oshirish hamda Farg‘ona viloyatidagi shahar jamoat transporti tizimini takomillashtirish bo‘yicha barcha zarur choralarni ko‘rmoqda. Bu haqida Upl.uz xabar berdi.
Shu doirada, “Ferganaavtotrans xizmat” mas’uliyati cheklangan jamiyati tomonidan 24 dona yangi Xitoy ishlab chiqarilgan Yutong markali avtobus xarid qilindi. Yaqin kelajakda ushbu yangi avtobuslar Farg‘ona shahrining yo‘nalishlarida ishga tushiriladi va shahar aholisi uchun xizmat ko‘rsatishni boshlaydi.
Hozirgi kunda Farg‘ona shahrida 6 ta avtobus yo‘nalishi mavjud bo‘lib, ularda jami 72 dona avtobus bitta brutto shartnoma asosida faoliyat yuritmoqda. Ushbu chora-tadbirlar shahar transport tizimini rivojlantirish va yo‘lovchilarga qulay shart-sharoit yaratish maqsadida amalga oshirilmoqda.
Transport vazirligi aholining harakatlanish imkoniyatlarini yaxshilash uchun ishlarni davom ettirmoqda.
