Buxoro viloyati bojxona boshqarmasi matbuot xizmati tomonidan noqonuniy tovarlar olib kirilishi to‘xtatilgani haqida ma’lum qilindi. Bu haqida Upl.uz xabar berdi.
O‘zbekiston va Turkmaniston chegarasida joylashgan Buxoro viloyatidagi “Alat” chegara bojxona postining xodimlari mamlakat hududiga kirayotgan yuk tashuvchi transport vositasida qo‘shimcha tekshiruv o‘tkazdilar. Yuk hujjatlarida avtomobil ehtiyot qismlari, qurilish materiallari va sovun tayyorlash uchun xom ashyo ko‘rsatilgan edi.
Biroq tekshiruv jarayonida aniqlanishicha, yuk mashinasida turli ta’mdagi 4,4 tonna kalyan tamaki, shuningdek, Pringles chiplari va Bounty, Mars hamda Twix shokolad batonchiklari borligi ma’lum bo‘ldi. To‘liq ko‘zdan kechirish sababi sifatida yukning maxsus harorat rejimida saqlanishi talab etiladigan refrijerator ichida bo‘lishi ko‘rsatildi.
Hujjatlarda ko‘rsatilgan tovarlar esa bunday sharoitni talab qilmas edi. Aniqlangan va musodara qilingan tovarlarning umumiy qiymati 7,5 milliard so‘mni tashkil qiladi.
Mazkur holat yuzasidan tergovga qadar tekshiruv ishlari olib borilmoqda.
