Xorazm viloyati IIB Yo‘l harakati xavfsizligi boshqarmasi matbuot xizmati tomonidan ma’lum qilinishicha, Koshkupir tumanida yolovchi avtomobilini boshqarayotgan voyaga yetmagan bola aniqlangan. Bu haqida Upl.uz xabar berdi.
Yo‘l-patrul xizmati xodimi tomonidan to‘xtatilgan "Damas" rusumli avtomobilni boshqarayotgan shaxs 8-sinf o‘quvchisi bo‘lgan voyaga yetmagan bola ekani aniqlangan. Bundan tashqari, avtomobilda yana uch nafar voyaga yetmagan bola bo‘lib, ular tumanda sayr qilgan.
Mazkur holat bo‘yicha bolaning ota-onasiga nisbatan ma’muriy tartibda tegishli hujjatlar rasmiylashtirilgan. Shuningdek, ota-onalar va bola bilan profilaktik suhbatlar o‘tkazilgan.
Ichki ishlar organlari ota-onalarga o‘z farzandlariga nisbatan mas’uliyatli bo‘lishni va ularni transport vositalarini boshqarishga yo‘l qo‘ymaslikni tavsiya qiladi. Bunday holatlar og‘ir oqibatlarga, hatto o‘limga olib kelishi mumkinligi haqida ogohlantiriladi.
Har bir ota-ona farzandining xavfsizligi ustuvor bo‘lishi lozim.
