Ichki ishlar organlari xodimlari tomonidan o‘tkazilgan tekshiruv natijasida Andijon viloyati Ekologiya boshqarmasining yuqori martabali xodimi bilan Jalolquduq tumani hokimining o‘rinbosari jinoyat sherikchiligi qilishganligi aniqlangan. Bu haqida Upl.uz xabar berdi.
Ular Xonobod shahrida joylashgan fermer xo‘jaligining boshlig‘idan 10 sotix yer maydonini qayta rasmiylashtirishni talab qilishgan. Buning evaziga ular fermer xo‘jaligi rahbaridan aniqlangan 4,1 milliard so‘mlik zarar summasini undirib olmaslik hamda jarima miqdorini o‘n barobar oshirish jazosi qo‘llanmasligini va’da qilishgan.
Shuningdek, ular Andijon tumanlararo ma’muriy sudidagi ish jarayonida ma’muriy sudlovda ham yordam berishni va’da qilgan. Mazkur holat yuzasidan hokim o‘rinbosarining akasi fermer xo‘jaligi rahbaridan kadastr hujjatlarini olgan vaqtida ushlangan.
U bu hujjatlarni xotinining nomiga qayta rasmiylashtirish uchun notariusga topshirishga harakat qilgan. Ushbu holat bo‘yicha O‘zbekiston Respublikasi Jinoyat kodeksining 2-qismi, “Poraxo‘rlik” moddasi bo‘yicha jinoyat ishi qo‘zg‘atilgan.
Jinoyatchilarga besh yildan o‘n yilgacha ozodlikdan mahrum qilish jazosi qo‘llanilishi mumkin.
