Ichki ishlar organlari xodimlari tomonidan o‘tkazilgan maxsus tezkor tadbir davomida Farg‘ona viloyati, O‘zbekiston tumani hududida noqonuniy ravishda sun’iy antifriz hamda motor moyi ishlab chiqaruvchi yashirin sex aniqlangan. Bu haqida Upl.uz xabar berdi.
Ushbu sexni 1985 yilda tug‘ilgan shaxs tashkil qilganligi ma’lum bo‘ldi. Mazkur shaxs mashhur brendlar, jumladan "Felix", "ZIC" hamda "Kixx" nomlari ostida soxta antifriz va motor moylarini ishlab chiqarib kelgan.
Shuningdek, tekshiruv jarayonida sexda suv nasoslari noqonuniy tarzda elektr tarmog‘iga ulanganligi aniqlangan. Hozirda noqonuniy faoliyat natijasida yetkazilgan zarar miqdori hisoblanmoqda.
Ushbu holat bo‘yicha dastlabki tergov harakatlari olib borilmoqda. Ichki ishlar organlari bunday jinoyatlarga qarshi qat’iy choralar ko‘rishni davom ettiradi va fuqarolarni soxta mahsulotlardan ehtiyot bo‘lishga chaqiradi.
