O‘zbekiston Respublikasi Transport vazirligi Shota Rustaveli ko‘chasini keng qamrovli rekonstruksiya qilishni e’lon qildi. Bu haqida Upl.uz xabar berdi.
Ushbu loyiha transport oqimini samaraliroq tashkil etish hamda barcha yo‘l harakati ishtirokchilari uchun infratuzilmani yaxshilashga qaratilgan. Rekonstruksiya yakunlangach, ko‘cha 10 ta yo‘l qatnoviga bo‘linadi.
Ulardan 6 tasi avtomobillar uchun, 2 tasi jamoat transportiga ajratilgan bo‘lib, ular markazda joylashadi. Shuningdek, 2 ta yo‘l chetida to‘xtash joylari uchun ajratilgan qatnovlar bo‘ladi.
Loyihada 11 ta yangi avtobus bekati qurilishi, taxminan 500 ta avtomobil uchun to‘xtash joylari tashkil etilishi va maxsus velosiped yo‘laklari barpo etilishi ko‘zda tutilgan. Yo‘l xavfsizligini ta’minlash maqsadida 21 ta piyoda va velosiped o‘tish joylari jihozlanadi.
Ushbu o‘zgarishlar jamoat transportining samaradorligini sezilarli darajada oshirishga xizmat qiladi. Transport vazirligining ma’lumotlariga ko‘ra, avtobus qatnovlari soni kuniga 2069 dan 2868 taga, ya’ni 40 foizga ko‘payadi.
Yo‘lovchilar oqimi ikki barobarga oshib, kuniga 300 ming kishiga yetadi. Avtobusda o‘rtacha yo‘l olish vaqti 25 daqiqadan 18 daqiqagacha qisqaradi, o‘rtacha tezlik esa 18,5 dan 23,6 kilometr soatga ko‘tariladi.
Avtobuslar harakati oralig‘i 7 daqiqagacha qisqartiriladi. Bu esa yo‘lovchilarga qulaylik yaratadi hamda transport tizimining samaradorligini oshiradi.
