Bosh prokuratura huzuridagi Departament matbuot xizmati tomonidan chekish mahsulotlari kontrabandasining oldi olindi. Bu haqida Upl.uz xabar berdi.
Rishton tumani boshqarmasi xodimlari hamda Davlat xavfsizlik xizmati chegara bo‘linmalari hamkorligida katta miqdordagi tamaki mahsulotlari noqonuniy olib kirilishi fosh etildi. Maxsus tezkor tadbir davomida O‘zbekiston hududiga Qirg‘izistondan 8 500 quti “ESSE Change” tamaki mahsulotlarini noqonuniy yo‘llar bilan olib kirgan shaxs qo‘lga olindi.
Bu yukning umumiy qiymati 297,5 million so‘mni tashkil qiladi. Surishtiruv jarayonida ushbu shaxs tamaki mahsulotlarini boshqa bir fuqaroning topshirig‘i asosida olib kirgani aniqlanib, u ham ushlangan.
Mazkur holat bo‘yicha O‘zbekiston Respublikasi Jinoyat kodeksining “Etanol spirtini, alkogol va tamaki mahsulotlarini noqonuniy aylanmasi yoki ishlab chiqarilishi” moddasiga asosan jinoyat ishi qo‘zg‘atildi. Hozirda tergov harakatlari olib borilmoqda va kontrabanda tashkilotchilari sifatida boshqa shaxslar ham aniqlanmoqda.
Ushbu ish bo‘yicha barcha qonuniy choralar ko‘rilmoqda.
