O‘zbekistonda qonunchilikni kuchaytirish rejalashtirilmoqda, bu orqali jamiyatda xavfsizlikni ta’minlash va huquqbuzarliklarning oldini olish maqsad qilinmoqda. Bu haqida Upl.uz xabar berdi.
Oliy Majlis Qonunchilik palatasi deputatlari birinchi o‘qishda zo‘ravonlikka moyil shaxslarga yangi cheklovlar joriy etuvchi qonun loyihasini ma’qulladi. Ushbu hujjatning asosiy maqsadi oilaviy zo‘ravonlik bilan bog‘liq jinoyatlarni sodir etgan shaxslarga qurol sotib olishni taqiqlashdir.
Shuningdek, qonun loyihasida bolalarga nisbatan zo‘ravonlik qilgan fuqarolardan ularning mavjud qurollarini vaqtincha olib qo‘yish nazarda tutilgan. Bundan tashqari, hujjat jamoat joylarida noqonuniy sovuq qurolni olib yurish bilan bog‘liq takroriy huquqbuzarlik uchun javobgarlikni kuchaytiradi.
Rasmiy ma’lumotlarga ko‘ra, so‘nggi paytlarda bunday holatlar keskin ko‘paygan. Yana bir muhim o‘zgarish giyohvand moddalar bilan bog‘liq kasalliklarga chalingan shaxslarga taalluqlidir.
Qonun loyihasi sud qarori asosida kamida bir marotaba ma’muriy javobgarlikka tortilganlarni majburiy davolanishga yo‘naltirishni taklif etadi. Deputatlar fikricha, ushbu qonun loyihasining qabul qilinishi jinoyatlarning oldini olishga, mahalla hududlarida jinoyat muhitini yaxshilashga va fuqarolarning hayoti hamda sog‘ligini samarali himoya qilishga yordam beradi.
