So‘nggi paytlarda Toshkent shahrida elektr ta’minoti ko‘p marotaba uzilib qolmoqda. Bu haqida Upl.uz xabar berdi.
Ayniqsa Yunusobod tumanida elektr energiyasi deyarli har kuni o‘chib qoladi. Hududiy elektr tarmoqlari tashkiloti ushbu uzilishlarning sababini ma’lum qildi.
Tashkilot xabariga ko‘ra, elektr uzilishlari asosan kuz-qish mavsumiga tayyorgarlik ko‘rish ishlari bilan bog‘liq. Hududlarda ta’mirlash ishlari olib borilayotgani uchun xavfsizlik maqsadida elektr ta’minoti vaqtincha to‘xtatiladi.
Shuningdek, tashkilot anomaliy issiqlik tufayli ba’zi avariyalar ham yuz berayotganini ta’kidladi. Biroq, Toshkent aholisi energetika vazirligi va elektr ta’minoti bilan shug‘ullanuvchi boshqa davlat organlarining faoliyatidan norozilik bildirmoqda.
Elektr uzilishlari ko‘p bo‘lishi bilan birga, uylarida kuchlanish darajasi juda past. Hozircha rahbariyat bu muammoni hal qilishga jiddiy e’tibor bermayapti, natijada aholi issiq yoz kunlarida katta qiynalmoqda.
Shu bois, mas’ullar ushbu muammoni tezroq hal etishi zarur. Elektr ta’minotining uzluksiz va sifatli bo‘lishi aholining hayot sifatini yaxshilashda muhim ahamiyatga ega.
