O‘zbekistonda qimmatbaho metallar va toshlar aylanmasini, shuningdek zargarlik mahsulotlari ishlab chiqarilishini tartibga soluvchi qonunchilikda keng qamrovli o‘zgarishlar joriy etilmoqda. Bu haqida Upl.uz xabar berdi.
Ushbu chora-tadbirlar sohani rivojlantirishga, shaffoflikni oshirishga hamda qonunbuzarliklarga qarshi samarali kurashishga qaratilgan. O‘zbekiston Respublikasi Prezidenti Shavkat Mirziyoyevning “Zargarlik mahsulotlari ishlab chiqarishini qo‘llab-quvvatlash bo‘yicha qo‘shimcha chora-tadbirlar to‘g‘risida”gi qaroriga muvofiq, 2026 yil 1 yanvardan boshlab zargarlik mahsulotlari va qimmatbaho metallar hamda toshlardan tayyorlangan yarim tayyor mahsulotlarni realizatsiya qilish bilan bog‘liq qiymat qo‘shilgan soliqdan ozod qilish imtiyozi bekor qilinadi.
Shuningdek, oltindan tayyorlangan zargarlik buyumlarini chakana savdoda sotish uchun belgilangan yig‘im ham bekor qilinadi. Tadbirkorlarni qo‘llab-quvvatlash maqsadida, zargarlik mahsulotlarini ishlab chiqarish yoki sotish bilan shug‘ullanadiganlarga to‘langan QQSning 80 foizi avtomatik ravishda respublika byudjetidan qaytarib beriladi.
Ushbu mexanizm 2028 yil 1 yanvargacha amal qiladi va mablag‘lar har oy 25-sanagacha qaytariladi. Bundan tashqari, 2025 yil 1 sentabrdan quyidagi yangiliklar joriy etiladi: yakka tartibdagi tadbirkorlarga zargarlik mahsulotlarini chakana sotish huquqi beriladi; Davlat probir nazorati inspeksiyasi Toshkent, Nukus shaharlarida va viloyat markazlarida zargarlik buyumlarining probasini tekshirish va muhrlash bo‘yicha joylarda xizmat ko‘rsatishni tashkil etadi; shuningdek, “Soliq” mobil ilovasi orqali qimmatbaho metallar va toshlarga oid qonunbuzarliklar haqida ma’lumot bergan shaxslarga jarimadan undirilib olingan summaning 50 foizi miqdorida mukofot puli to‘lanadi.
Ushbu choralar qonuniy faoliyat yurituvchi sub’ektlarni qo‘llab-quvvatlash va sohada qonunbuzarliklarni kamaytirishga xizmat qiladi.
👍 0❤️ 0😂 0😢 0😡 0
