O‘zbekiston Respublikasi Prezidenti Shavkat Mirziyoyev tomonidan soliq kodeksiga qo‘shimchalar kiritishga doir qonun imzolandi. Bu haqida Upl.uz xabar berdi.
Mazkur o‘zgarishlar ortiqcha to‘langan soliqlarni hisobga olish tartibini soddalashtiradi hamda ularni foydalanish imkoniyatlarini kengaytiradi. Ilgari soliq to‘lovchida ortiqcha to‘lov yuzaga kelgan taqdirda, u faqat kelajakdagi shu turdagi soliq to‘lovlariga hisobga olinishi mumkin edi.
Endilikda, O‘zbekiston Respublikasi Soliq kodeksining 103-moddasiga kiritilgan o‘zgarishlarga muvofiq, ortiqcha to‘langan yoki noto‘g‘ri talab qilingan soliq summasi, qarzdorlik bo‘lmasa, to‘lovchiga qaytariladi yoki kelajakdagi shu yoki boshqa turdagi soliqlarga hisobga olinishi mumkin. Shuningdek, bunday arizalarni ko‘rib chiqish muddati sezilarli darajada qisqartirildi.
Agar ilgari boshqa turdagi soliqlar bo‘yicha ortiqcha to‘lovni hisobga olish uchun 15 kungacha vaqt talab etilgan bo‘lsa, endi soliq to‘lovchining yozma yoki elektron murojaatiga binoan soliq organlari buni atigi uch ish kuni ichida amalga oshirishlari shart. Bu o‘zgarishlar soliq tizimining samaradorligini oshirishga xizmat qiladi hamda soliq to‘lovchilarga qulaylik yaratadi.
