Bugun ijtimoiy tarmoqlarda Toshkent shahrining Uchtepa tumanida joylashgan Kaltsevaya avtomobil yo‘li ko‘chasidagi «Stroy Gorod» qurilish bozorining elektr ta’minotidan uzilgani haqida noto‘g‘ri ma’lumot tarqaldi. Bu haqida Upl.uz xabar berdi.
Toshkent shahar Favqulodda vaziyatlar bosh boshqarmasi ma’lumotiga ko‘ra, bozor vaqtincha yopilgan bo‘lib, bu holat 2025 yil 13 iyunda Toshkent shahrining Hududlararo iqtisodiy sudi tomonidan qabul qilingan qarorga asoslangan. Qarorga muvofiq, «OZIQ-OVQAT STANDART KARTON» MChJga tegishli savdo maydonchalari va binolar faoliyati yong‘in xavfsizligi qoidalarining buzilishi hamda boshqa qonunbuzarliklar to‘liq bartaraf etilgunga qadar to‘xtatildi.
Sud qarorining ijrosi 2025 yil 27 iyunda boshlandi va obyekt yopilishi Toshkent shahar Favqulodda vaziyatlar bosh boshqarmasi xodimlari tomonidan amalga oshirildi. Shu sababli, bozorda elektr ta’minoti uzilgani haqidagi ma’lumotlar haqiqatga to‘g‘ri kelmaydi.
Bozor faoliyatining vaqtincha to‘xtatilishi qonuniy asosga ega bo‘lib, xavfsizlik choralari to‘liq bajarilgach, faoliyat tiklanadi.
