O‘zbekiston Respublikasi Oliy Majlisi Qonunchilik palatasi deputatlari Senatga qimmatbaho metallar, toshlar va valyuta qiymatlari noqonuniy aylanmasi uchun javobgarlikni kuchaytiruvchi qonun loyihasini taqdim etdilar. Bu haqida Upl.uz xabar berdi.
Ushbu hujjat sohadagi tartibga solishni takomillashtirish va qonunchilikni zamonaviy talablar darajasiga yetkazish maqsadida ishlab chiqilgan. Qonun loyihasi jinoyat kodeksi hamda ma'muriy javobgarlik kodeksida o‘zgarishlarni nazarda tutadi.
Endilikda qimmatbaho metallar va toshlarni noqonuniy sotib olish yoki sotishda nafaqat ma'muriy, balki jinoyat javobgarligi ham qo‘llaniladi. Shuningdek, valyuta qiymatlari, qimmatbaho metallar va toshlar sohasidagi tushunchalar qonun hujjatlarida uyg‘unlashtiriladi.
Qonun loyihasining ta’siri zargarlik buyumlari va uy-ro‘zg‘or buyumlariga, ular qimmatbaho metallar va toshlardan tayyorlangan bo‘lsa ham, taalluqli emas. Deputatlar fikricha, mazkur qonun loyihasining qabul qilinishi valyuta, qimmatbaho metallar va toshlar aylanmasidagi qonunlarni bir xilda qo‘llashga yordam beradi hamda huquqbuzarliklarning oldini olishga xizmat qiladi.
👍 0❤️ 0😂 0😢 0😡 0
