O‘zbekiston Respublikasida ingliz tilidan xalqaro malaka imtihoni IELTS topshirish tartibida muhim o‘zgarishlar joriy etilmoqda. Bu haqida Upl.uz xabar berdi.
Edu-Action Centre markazi matbuot xizmati tomonidan berilgan rasmiy bayonotga ko‘ra, 2025 yil 11 iyuldan boshlab an’anaviy qog‘oz shaklidagi test topshirish to‘liq bekor qilinadi. Markaz vakillari ta’kidlashicha, ushbu qaror operatsion sabablar bilan izohlanadi, ammo tafsilotlar oshkor qilinmaydi.
Endilikda mamlakat hududida IELTS sertifikatini olishni istagan nomzodlar uchun faqat kompyuter shaklidagi test topshirish imkoniyati mavjud bo‘ladi. Bu o‘zgarish O‘zbekistonda dunyoda keng tarqalgan ushbu til imtihonini to‘liq raqamlashtirish jarayonining yakuniy bosqichi hisoblanadi.
11 iyuldan keyingi sanalar uchun qog‘oz shaklidagi imtihonga ro‘yxatdan o‘tgan va to‘lovni amalga oshirgan nomzodlarga ikkita muqobil variant taklif etildi. Ular qo‘shimcha xarajatlarsiz kompyuter formatiga qayta ro‘yxatdan o‘tish yoki oldindan to‘langan summani to‘liq qaytarib olish huquqiga ega.
Ushbu yangilik O‘zbekistonning ingliz tilini bilish bo‘yicha xalqaro reytingdagi pasayishlari fonida yuz bermoqda. Statistik ma’lumotlarga ko‘ra, eng past ko‘rsatkichlar Namangan viloyatida qayd etilgan bo‘lib, bu holat ta’lim tizimi vakillari va ekspertlar orasida xavotir uyg‘otmoqda.
To‘liq raqamli formatga o‘tish nomzodlarning tayyorgarligi va imtihon natijalariga ijobiy ta’sir ko‘rsatishi kutilmoqda. Shuningdek, testning Listening, Reading va Writing modullari kompyuter orqali topshirilsa-da, Speaking (og‘zaki) bo‘limi sertifikatlangan imtihon oluvchi bilan jonli suhbat shaklida o‘tkaziladi.
Bu nomzodning kommunikativ ko‘nikmalarini aniq va adolatli baholashni ta’minlash maqsadida amalga oshiriladi.
