Ijtimoiy tarmoqlarda Toshkent shahridagi yer usti metropolitenining ba'zi stansiyalarining vaqtinchalik yopilishi keng muhokama qilinmoqda. Bu haqida Upl.uz xabar berdi.
Shuningdek, ayrim yo‘nalishlarning buzilib, qayta qurilishi haqida turli mish-mishlar tarqalmoqda. Ayniqsa, yaqinda ishga tushirilgan yo‘nalishda yangi relslarning olib tashlanayotganiga oid videolar foydalanuvchilar orasida xavotir uyg‘otmoqda.
Biroq, Toshkent metropoliteni ushbu gap-so‘zlarni rasmiy bayonot bilan rad etdi. Toshkent metropolitenining matbuot xizmatining rahbari Tuychi Mirzaev bildirishicha, olib borilayotgan ishlar demontaj yoki qayta qurilish bilan bog‘liq emas.
Bu ishlar rejalashtirilgan texnik ko‘rik va kamchiliklarni bartaraf etish hamda profilaktik xizmat ko‘rsatish bilan bog‘liq bo‘lib, xalqaro standartlarga muvofiq amalga oshirilmoqda. Ma’lum qilinishicha, «Texnopark» va «Qipchoq» stansiyalari orasidagi yer usti halqa yo‘nalishidagi 14 ta stansiya bir necha yildan buyon faoliyat yuritmoqda.
Xalqaro tajribaga ko‘ra, yangi metropoliten yo‘nalishlarida ma’lum bir muddatdan so‘ng xavfsizlikni ta’minlash va xizmat sifatini baholash uchun profilaktik ishlovlar o‘tkazish zarur. Bu oddiy va majburiy jarayon bo‘lib, tizimning ishonchliligi va xavfsizligini saqlashga qaratilgan.
Shuningdek, ilgari Toshkentda rejalashtirilgan ishlar sababli 7 ta metro stansiyasining yopilishi haqida ma’lumot berilgan edi. Ushbu tekshiruvlar davomida transport prokuraturasi jiddiy qonunbuzarliklarni aniqlagan.
Bu holatlar metropolitenning xavfsiz va barqaror ishlashini ta’minlash uchun zarur choralarning ko‘rilayotganini ko‘rsatadi.
