Uzenergoinspektsiya matbuot xizmati tomonidan ma'lum qilinishicha, gaz ta’minotiga yashirin ulanish holati aniqlangan. Bu haqida Upl.uz xabar berdi.
Farg‘ona viloyati Uzenergoinspektsiyasi boshqarmasi xodimlari hamda boshqa huquqni muhofaza qiluvchi organlar bilan hamkorlikda nazorat tadbirlari o‘tkazilgan. Tadbir davomida Dang‘ara tumanidagi “X.Q.K.” nomli xususiy korxonaning ovqatlanish muassasasi tekshirilgan.
Tekshiruv jarayonida oshxonaning barcha gaz uskunalari iste’mol gazini hisobga olish moslamasini chetlab o‘tgan holda yashirin tarzda gaz ta’minotiga ulanganligi aniqlangan. Shu asosda gaz ta’minoti tashkilotiga yetkazilgan zarar 2 milliard 887 million so‘m miqdorida baholangan.
Topilgan barcha materiallar huquqni muhofaza qiluvchi organlarga taqdim etilgan va hozirda dastlabki tergov harakatlari olib borilmoqda.
