Sloveniya O‘zbekistondan bo‘lgan shifokorlarni ishga taklif etmoqda. Bu haqida Upl.uz xabar berdi.
Shifokorlarga Tolmin shahridagi “Zdravstveni dom Tolmin” tibbiyot muassasasida ishlash imkoniyati taqdim etiladi. Nomzodlarga oyiga 2500 yevro maosh, tibbiy sug‘urta, ovqatlanish va transport xarajatlari uchun to‘lovlar kafolatlanadi.
Bundan tashqari, O‘zbekiston fuqarolari ish stajiga qarab qo‘shimcha moliyaviy rag‘batlar oladilar. Shifokorlar uchun malaka oshirish sharoitlari yaratiladi hamda mehnat ta'tili beriladi.
Ishga joylashish uchun nomzodlar tibbiyot diplomini hamda jinoyat qaydnomasi yo‘qligi haqidagi ma’lumotnomani taqdim etishlari zarur. Shuningdek, ular O‘zbekistonni tark etishga hech qanday cheklovga ega bo‘lmasliklari lozim.
Ishga kirgach, shifokorlar ingliz tilini bilishlari talab qilinadi va Sloveniya tilini o‘rganishni boshlashlari lozim. Ushbu taklif O‘zbekistonlik shifokorlar uchun yaxshi imkoniyat hisoblanadi.
