Sirdaryo viloyati IIB YHXB matbuot xizmatidan ma’lum qilishlaricha, yo‘l harakati qoidalarini buzgan shaxsga nisbatan tegishli choralar ko‘rilgan. Bu haqida Upl.uz xabar berdi.
Ijtimoiy tarmoqlarda Sirdaryo viloyatida “Gazel” markali evakuator haydovchisining umumiy foydalaniladigan yo‘l bo‘ylab xavfli harakatlar qilayotgani aks etgan video tarqaldi. Ushbu haydovchi orqasidan kelayotgan boshqa transport vositasiga yo‘l berish o‘rniga, xavfli manevrlar qilib, ko‘p marotaba avariyaviy vaziyatlarni yuzaga keltirgan va shu bilan boshqa yo‘l harakati ishtirokchilarining hayotini xavf ostiga qo‘ygan.
Mazkur holat yuzasidan O‘zbekiston Respublikasining Ma’muriy javobgarlik kodeksining “Yo‘l qoidalarini buzish” moddasiga asosan, haydovchiga nisbatan ma’muriy bayonnoma tuzildi. Guliston shahar jinoyat ishlari bo‘yicha sudining qaroriga binoan, ushbu shaxs 9 375 000 so‘m jarimaga tortildi.
Bundan tashqari, unga haydovchilik guvohnomasi bir yil muddatga olib qo‘yildi. Bu chora-tadbirlar yo‘l harakati xavfsizligini ta’minlash va bunday holatlarning oldini olish maqsadida amalga oshirildi.
