O‘zbekiston Respublikasi Davlat statistika qo‘mitasi tomonidan 2025 yil yanvar-iyun oylarida o‘tkazilgan tanlov tadqiqotlari natijalariga ko‘ra, mamlakatda har 100 ta uy xo‘jaligiga o‘rtacha 84 dona elektr changyutgich to‘g‘ri keladi. Bu haqida Upl.uz xabar berdi.
So‘nggi o‘n yilliklar davomida o‘tkazilgan tahlillar shuni ko‘rsatadiki, uy xo‘jaliklaridagi changyutgichlar soni barqaror ravishda o‘sib bormoqda. Bu jarayon aholining turmush darajasining yaxshilanishi, daromadlarning oshishi va kundalik hayot sharoitlarini yanada qulay qilishga bo‘lgan ehtiyojlarning o‘zgarishi bilan chambarchas bog‘liqdir.
Uy xo‘jaliklarining changyutgich bilan ta’minlanish dinamikasi quyidagicha: 2000 yilda 100 ta uy xo‘jaligiga 30 dona, 2005 yilda 33 dona, 2010 yilda 37 dona, 2015 yilda 53 dona, 2020 yilda 60 dona va 2025 yilning birinchi yarim yilligida 84 dona changyutgich to‘g‘ri kelgan. Ushbu ma’lumotlarga ko‘ra, 2000 yildan beri changyutgichlar soni uch baravarga yaqin oshgan.
Ayniqsa, 2010 yildan keyin bu ko‘rsatkichda sezilarli o‘sish kuzatilgan. Bu o‘zgarishlar aholining turmush darajasining yaxshilanishi va texnologiyalarga bo‘lgan talabning ortishi bilan izohlanadi.
