2025-yil 10-iyulda “O‘zbekiston Respublikasi fuqarolarining, chet el fuqarolari va fuqaroligi bo‘lmagan shaxslarning yashash va vaqtinchalik istiqomat joyida ro‘yxatga olinishi to‘g‘risida”gi Qonun qabul qilindi (№ ZRU–1074). Bu haqida Upl.uz xabar berdi.
Ushbu qonun aholi hisobini yuritish jarayonini soddalashtirish va tizimlashtirish maqsadida ishlab chiqildi. Bu haqda O‘zbekiston Respublikasi Adliya vazirligi matbuot xizmati ma’lum qildi.
Qonunga muvofiq, endilikda yashash joyiga yoki vaqtinchalik istiqomat joyiga ro‘yxatga olinishi kerak bo‘lgan shaxslarni yashash joyini taqdim etuvchi uy egasi yoki undan foydalanish huquqiga ega shaxs o‘z vaqtida ro‘yxatga olish majburiyatiga ega. Mehmonxonalar, hostellar va boshqa turar joylarda istiqomat qiluvchi shaxslar uchun esa ro‘yxatga olish xabar berish tartibida amalga oshiriladi.
Bu jarayon “E-mehmon” maxsus tizimi orqali mas’ul xodimlar tomonidan bajariladi. Doimiy ravishda chet elda yashovchi O‘zbekiston fuqarolari mamlakatga kirganlaridan keyin 10 ish kuni ichida yashash yoki vaqtinchalik istiqomat joyida ro‘yxatdan o‘tishlari shart.
Fuqarolar yashash joyida ro‘yxatdan o‘tish uchun quyidagi qulay usullardan foydalanishlari mumkin: - Ichki ishlar organlarining migratsiya va fuqarolikni rasmiylashtirish bo‘limlarida; - Davlat xizmatlari markazlarida; - Davlat xizmatlari yagona interaktiv portali (my.gov.uz) orqali. Yangi qonundagi muhim talablaridan biri shundaki, yashash yoki vaqtinchalik istiqomat joyida ro‘yxatga olishda ijtimoiy yashash maydonining normativlariga rioya qilinishi lozim.
Bu fuqarolarning yashash sharoitlarini yaxshilashga qaratilgan.
