2025 yil iyul oyida e’lon qilingan Mental State of the World xalqaro tadqiqotining natijalariga ko‘ra, O‘zbekiston aholining ruhiy salomatligi bo‘yicha 83 davlat orasida 74-o‘rinni egalladi. Bu haqida Upl.uz xabar berdi.
Mamlakatimiz reytingning past qismida joylashgan bo‘lsa-da, Markaziy Osiyo davlatlari orasida nisbatan yaxshi ko‘rsatkichlarga ega ekanligi ta’kidlanadi. Qo‘shni davlatlar esa undan ham past o‘rinlarda turadi.
Masalan, Qozog‘iston 76-o‘rinni, Qirg‘iziston 79-o‘rinni, Tojikiston esa 80-o‘rinni band qilgan. Tadqiqotchilarning fikricha, mintaqada aholining xavotir darajasi yuqori, depressiv holatlar keng tarqalgan va stressga chidamlilik past darajada.
Ruhiy salomatlik indeksi bir qator muhim mezonlarni, xususan, hissiy holat, kognitiv qobiliyatlar, motivatsiya, ijtimoiy faoliyat va moslashuvchanlikni baholaydi. Reytingda Dominikan Respublikasi, Tanzaniya va Panama davlatlari yetakchi bo‘lib, u yerda hissiy farovonlik va chidamlilik yuqori ekanligi qayd etilgan.
O‘zbekiston mintaqadagi umumiy qiyinchiliklarga qaramay, qo‘shnilariga nisbatan nisbatan barqaror ruhiy holatni namoyish etmoqda. Markaziy Osiyoda ruhiy salomatlik muammolarining asosiy sabablari sifatida ijtimoiy-iqtisodiy bosim, ruhiy kasalliklarga nisbatan madaniy stigmatizatsiya va malakali psixologik yordamga cheklangan imkoniyatlar ko‘rsatiladi.
Shu bilan birga, mavjud tendensiyalar milliy ruhiy salomatlikni qo‘llab-quvvatlash dasturlarini rivojlantirish imkonini beradi.
