N. Bu haqida Upl.uz xabar berdi.
A. Dobrolyubov nomidagi Nijegorod davlat lingvistik universiteti va O‘zbekiston Respublikasi Xalqaro innovatsion universiteti hamkorlik to‘g‘risida shartnoma imzoladi.
Ushbu kelishuvni rasmiylashtirish marosimi videokonferensiya shaklida o‘tkazildi. Tadbirda Nijegorod davlat lingvistik universiteti vazifasini bajaruvchi rektori Nikita Avralev hamda Xalqaro innovatsion universitet rektori Amin Mallaev ishtirok etdi.
Nikita Avralev ushbu hamkorlik ikki ta’lim muassasasi talabalari va professor-o‘qituvchilari uchun noyob imkoniyatlar yaratishini ta’kidladi. U universitetlar qisqa va uzoq muddatli mutaxassislar almashinuvi dasturlarini amalga oshirish hamda birgalikda ilmiy tadqiqotlar olib borish bo‘yicha kelishib olganini bildirdi.
Bu nafaqat o‘qituvchilarning tajribasini boyitadi, balki ta’lim sifatini sezilarli darajada oshirishga, talabalarga noyob dasturlar va kurslarni taklif qilishga yordam beradi. Xalqaro innovatsion universitet rektori Amin Mallaev esa ushbu imkoniyatlar uchun Nijegorod davlat lingvistik universiteti rahbariyatiga chuqur minnatdorlik bildirdi.
U ushbu universitetni Xalqaro innovatsion universitet uchun strategik hamkor sifatida muhim hamkorlik doirasida ko‘rishini ta’kidladi. Yangi hamkorlikning asosiy yo‘nalishlaridan biri Xalqaro innovatsion universitet negizida Rus tili markazini tashkil etish bo‘ladi.
Nijegorod davlat lingvistik universitetining yoshlar siyosati va xalqaro hamkorlik bo‘yicha prorektori Anna Goroxova bu markaz ta’lim dasturlarini ishlab chiqish va amalga oshirish uchun ko‘p funksiyali platforma bo‘lishini ma’lum qildi. Markaz faoliyati O‘zbekiston fuqarolarining rus tilini chuqur o‘rganishiga hamda Rossiya tarixi va madaniyati bilan tanishishiga qaratiladi.
Anna Goroxova bunday tashabbuslarning ikki davlat uchun katta ahamiyatga ega ekanini ta’kidladi. Uning fikricha, O‘zbekiston uchun bu rus tili va madaniyatini chuqur o‘zlashtirish imkoniyati bo‘lib, ko‘p madaniyatli jamiyat barpo etish hamda xalqaro muloqotni kengaytirishga xizmat qiladi.
Rossiya tomoni uchun esa bu o‘z pozitsiyalarini xalqaro maydonda mustahkamlash, rus tili va madaniyatini Rossiya Federatsiyasi tashqarisida targ‘ib qilish imkoniyatidir. Yangi shartnomani amalga oshirish koordinatori sifatida Nijegorod davlat lingvistik universiteti rektori maslahatchisi, xorijda rus tilini rivojlantirish bo‘yicha professor Natalya Makshantseva tayinlandi.
U markaz mutaxassislari o‘zbek fuqarolariga rus tilini o‘rgatish bilan birga Rossiya Federatsiyasi qonunchiligi asoslarini ham o‘rgatadigan maxsus kurslarni olib borishini ma’lum qildi. Natalya Makshantseva markazda rus tili va profil fanlar bo‘yicha tayyorlov kurslari tashkil etilishi, ular xorijiy abituriyentlarning Rossiya universitetlariga kirish uchun talablariga to‘liq javob berishini aytdi.
Ta’lim dasturlari talabalarning chet til sifatida rus tilidan davlat testlaridan muvaffaqiyatli o‘tishlari uchun mo‘ljallangan bo‘ladi. Bu esa ularning Rossiya ta’lim tizimiga integratsiya qilinishida muhim bosqich hisoblanadi.
Shuningdek, Nijegorod universiteti mutaxassislari o‘zbek rus tili o‘qituvchilariga metodik yordam ko‘rsatadi, ilmiy-metodik seminarlar tashkil etadi hamda turli darajadagi ta’lim dasturlarini ishlab chiqishda ishtirok etadi. N.
A. Dobrolyubov nomidagi Nijegorod davlat lingvistik universiteti xalqaro hamkorlikda katta tajribaga ega.
Hozirgi kunda universitet O‘zbekiston Respublikasi turli oliy ta’lim muassasalari bilan 17 ta shartnoma imzolagan. Universitetda 40 nafar o‘zbek talabalari tahsil olmoqda, bu esa yaqin xorij mamlakatlaridan kelgan talabalar orasida eng yuqori ko‘rsatkichdir.
Nijegorod universitetida chet tilli talabalar uchun lingvistika va filologiya sohalarida magistratura hamda bakalavriat ta’lim dasturlari mavjud.
