Davlat xavfsizlik xizmati matbuot xizmati xabariga ko‘ra, xalqaro terrorchilik tashkilotining yashirin guruhi fosh etildi. Bu haqida Upl.uz xabar berdi.
Namangan shahrida Davlat xavfsizlik xizmati va ichki ishlar organlari hamkorligida maxsus operativ tadbir o‘tkazildi. Tadbir davomida “Islom davlati – Xorasan viloyati” nomli xalqaro terrorchilik tashkilotining yashirin guruhi aniqlanib, faoliyati taqiqlangan ushbu guruh a’zolari qo‘lga olindi.
Jami 16 nafar guruh a’zosi aniqlandi, ularning 13 nafari ayollar edi. Qo‘lga olinganlardan 37 ta mobil aloqa vositasi, 51 ta taqiqlangan diniy adabiyotlar, 40 ta kompakt-disk, 4 ta flesh-disk, shuningdek, noutbuk va planshet ashyolar sifatida olib qo‘yildi.
Ushbu guruh Namangan viloyatining Davlatobod tumanida yashovchi ayol tomonidan tashkil etilgan bo‘lib, u jihodni faol targ‘ib qilgan. U Telegram kanallari va guruhlarini yaratib, unda 120 dan ortiq foydalanuvchilarga taqiqlangan diniy materiallarni tarqatgan hamda ular bilan faol munozaralar olib borgan.
Shu bilan birga, u “Islom davlati” tashkil etilishini targ‘ib qilgan va mamlakatimizdagi siyosiy qarashlarga qarshi chiqib, shariat qonunlarini joriy etishni qo‘llab-quvvatlagan. Aniqlanishicha, guruh rahbarasi 2022 yilda Istanbul shahrida noqonuniy diniy ta’lim olgan va uning diniy qarashlari agressivlik va ekstremizmga o‘zgargan.
Uning otasi uni to‘xtatishga harakat qilgan, ammo ayol uni kamsitib, yordamni rad etgan. Tekshiruv jarayonida guruh a’zolaridan biri Namangan shahridagi xususiy universitetlardan birining tashkilotchisi ekanligi ham ma’lum bo‘ldi.
Hozirda ushbu holat bo‘yicha jinoyat ishi qo‘zg‘atilgan va tergov harakatlari davom etmoqda. Tegishli organlar tomonidan zarur choralar ko‘rilmoqda.
