Xorazm viloyati ichki ishlar boshqarmasi matbuot xizmati tomonidan ma’lum qilinishicha, noqonuniy faoliyatni tashkil qilgan shaxs aniqlangan. Bu haqida Upl.uz xabar berdi.
Joriy yilning 18 iyul kuni ichki ishlar organlari xodimlari tomonidan Xorazm viloyatida maxsus tezkor tadbir o‘tkazildi. Tadbir davomida Qushkupir tumani "Chamanzor" mahallasida yashovchi, 1969 yilda tug‘ilgan fuqaro o‘z uyida qimor o‘yinlari uchun yashirin joy tashkil qilgani aniqlandi.
Ushbu shaxs qimor o‘yinlarini o‘tkazish uchun barcha zarur sharoitlarni yaratgan. Tezkor tadbir vaqtida noqonuniy muassasaga kirgan 21 dan 53 yoshgacha bo‘lgan 10 nafar fuqaro aniqlanib, ulardan bir necha to‘plam o‘yin kartalari hamda 38,4 million so‘mdan ortiq pul mablag‘lari musodara qilindi.
Ushbu holat bo‘yicha O‘zbekiston Respublikasi Jinoyat kodeksining "Qimor o‘yinlarini tashkil etish va o‘tkazish" moddasi bo‘yicha jinoyat ishi qo‘zg‘atilgan. Noqonuniy faoliyatni tashkil qilgan shaxs 7 yilgacha ozodlikdan mahrum etilishi mumkin.
