O‘zjan va Erjan Deniz o‘rtasida moliyaviy mojaro yuz berdi

Turkiyalik taniqli aktyor va xonanda O‘zjan Deniz yana bir bor ommaning e’tiboriga tushdi. Bu haqida Zamin.uz xabar berdi.

Bu safargi sababi oilaviy va moliyaviy mojaro bo‘ldi. Haber Global nashrining xabar berishicha, aktyorning akasi Erjan Deniz ukasining uyiga qurol bilan kelib, moliyaviy kelishmovchiliklar sabab uni o‘ldirish bilan tahdid qilgan.

Voqea Istanbul shahrining Zekeriyako‘y tumanida yuz berdi. Erjan Deniz uyga kirib, O‘zjanga shunday degan: “Agar mendan o‘g‘irlaganingni qaytarmasang, seni ham, o‘zimni ham o‘ldiraman”.

Bu so‘zlar oilaviy ziddiyatning qanchalik keskin ekanini ko‘rsatadi. Masala ildizi 22 yillik biznes sherikligiga borib taqaladi.

Ularning moliyaviy kelishmovchiliklari sudgacha yetib borgan. Bir necha yil oldin O‘zjan akasi qarzlari uchun kafil bo‘lgan, ammo biznesda katta zarar ko‘rilganidan so‘ng bank hisoblari musodara qilingan.

Shu sababli Erjan ukasini 150 million lira miqdoridagi mablag‘ni o‘zlashtirishda ayblab kelgan. Oilaviy mojaro ijtimoiy tarmoqlarda keng yoritildi.

Ularning onasi Qadriya Deniz moliyaviy muammolar tufayli aka-ukalik rishtalari uzilganini bildirgan. O‘zjan esa oilasi tomonidan unga nisbatan nohaq munosabat bo‘lganini ta’kidlab, keskin javob qaytargan.

Shuningdek, aktyor 2008 yilda unga qarshi qilingan qurolli hujum ortida ham akasi turganini aytgan. So‘nggi voqealardan so‘ng taraflar vakillari muzokara o‘tkazib, kelishuvga erishishdi.

Natijada bir necha villa va boshqa ko‘chmas mulk Erjan Deniz nomiga o‘tkazildi. Ushbu voqea muxlislar orasida katta qiziqish uyg‘otdi va oilaviy mojaro hamda moliyaviy ziddiyatlar yuzasidan muhokamalar yanada kengaydi.