Axsikentda VIII asr tangalari va qo‘lyozmalar topildi

Axsikent arxeologiya parkida yangi tarixiy topilmalar jamoatchilik e’tiborini qozondi. Bu haqda Zamin.uz xabar berdi.

Majmua fondi noyob eksponatlar bilan boyidi. Ushbu safar yig‘ilgan xazinada VIII asrga oid 68 dona qadimiy tanga va 27 dona qo‘lyozma kitob mavjud.

Arxeopark rahbari Anvar Ikromning so‘zlariga ko‘ra, Abbosiylar davriga mansub kumush tangalarda o‘sha davrga xos bezaklar va arab yozuvidagi aniq yozuvlar saqlangan. Topilgan qo‘lyozmalarda handasa, riyoziyot, astronomiya va tibbiyotga oid qimmatli ma’lumotlar jamlangan.

Shuningdek, Somoniy va Qoraxoniy sulolalari davriga tegishli tangalar ham mavjud. Bundan tashqari, 1667–1670 yillar oralig‘ida Shvetsiyada, 1836 yilda esa Buyuk Britaniyada zarb qilingan tangalar ham topildi.

Mutaxassislar ta’kidicha, eng qadimiy kumush tangalar miloddan avvalgi III asrga taalluqlidir. Ularning old yuzida hukmdor surati, orqa tomonida esa ramziy tasvirlar, podsholarning ismi va tamg‘alari mavjud.

Hozirda Axsikent kompleksining Yakkayigit bog‘ida, Umarshayx Mirzoning rezidensiyasi hisoblangan joyda qazish ishlari davom etmoqda. Yangi topilmalar nafaqat mahalliy aholining, balki ilmiy doiralar va keng jamoatchilikning ham katta qiziqishini uyg‘otdi.

Ushbu kashfiyot Axsikentning boy madaniy va ilmiy merosga ega tarixiy markaz ekanligini yana bir bor tasdiqladi.