Mirjalol Ne’matov ruxsatsiz she’r ijro etdi
Xonanda Mirjalol Ne’matov tomonidan ijro etilgan ikki she’r muallifning roziligisiz aytilgani aniqlanib, bu haqda Adliya vazirligi rasmiy ma’lumot berdi. Bu haqda Zamin.uz xabar berdi.
O‘zbekiston Respublikasi Mualliflik va turdosh huquqlarni himoya qilish jamiyati a’zosi Farhod Muminov o‘zining “Qo‘shni qiz” va “Men turganda” nomli she’rlari Mirjalol Ne’matov tomonidan ruxsatsiz ijro etilganligi yuzasidan Adliya vazirligiga murojaat qilgan. O‘tkazilgan tekshiruv jarayonida mazkur she’rlar muallifning roziligisiz ijro etilgani tasdiqlandi.
Shunga ko‘ra, Mirjalol Ne’matovga nisbatan Ma’muriy javobgarlik to‘g‘risidagi kodeksning 177-1-moddasi asosida bayonnoma rasmiylashtirilib, ish sudga yuborildi. Toshkent shahar Uchtepa tuman jinoyat ishlari bo‘yicha sudi qaroriga ko‘ra, xonanda aybdor deb topilib, jarima jazosi tayinlandi.
Mutaxassislarning fikricha, har qanday ijrochi asarni ommaga taqdim etishdan avval muallifdan rozilik olishi lozim. Aks holda, bu holat mualliflik huquqlarining buzilishi sifatida baholanadi va qonuniy javobgarlikka olib keladi.
Shuning uchun ijrochilar va san’atkorlar mualliflik huquqlariga hurmat bilan qarashi zarur.
