Jeki Chan “Xudo zirhi 4”ni Qozog‘istonda suratga oladi

Gollivudning mashhur aktyori Jeki Chan afsonaviy “Xudo zirhi” filmining yangi qismini suratga olish uchun tayyorgarlik ko‘rmoqda. Bu haqda Zamin.uz xabar berdi.

Qozog‘istonning Salem Entertainment studiyasi ma’lumotiga ko‘ra, aktyor “Xudo zirhi” franshizasining to‘rtinchi qismini aynan Qozog‘istonda yaratadi. Sentabr oyining oxirida Jeki Chan Olmaotaga tashrif buyurib, yangi film — “Xudo zirhi: Ultimatum” uchun suratga olish joylarini tanlash bilan shug‘ullangan.

Studiyaning bayonotida aytilishicha, millionlab tomoshabinlar sevimli kult filmning yangi qismi aynan Qozog‘istonda suratga olinadi. Filmning asosiy suratga olish ishlari mamlakat hududida amalga oshiriladi, biroq ssenariy va ishlab chiqarish jarayoni haqida hozircha qo‘shimcha ma’lumotlar berilmagan.

“Xudo zirhi” franshizasining birinchi qismi 1986 yilda, ikkinchisi 1991 yilda, uchinchi qismi esa 2012 yilda ekran yuzini ko‘rgan. Ushbu loyihalarda Jeki Chan nafaqat bosh rolni ijro etgan, balki rejissyor sifatida ham faol qatnashgan.

Shuningdek, joriy yil bahorida u “Oshqin soat” komediyasining davom filmida ham ishtirok etish ehtimoli borligini ma’lum qilgan edi.