“Oskar”da hayvonlar uchun alohida nominatsiya joriy etilishi mumkin
Endilikda “Oskar” mukofotida to‘rt oyoqli aktyorlar uchun alohida nominatsiya joriy etilishi mumkin. Bu haqda Zamin.uz xabar berdi.
IFC kinokompaniyasi “Itning nigohi bilan” filmida bosh rolni ijro etgan it – Indi nomidan Kino san’ati va fanlari akademiyasiga rasmiy murojaat yubordi. Bu haqda Variety nashri xabar berdi.
Xatda Indi hazilomuz tarzda Akademiya a’zolaridan uni “Eng yaxshi erkak roli” nominatsiyasiga nomzod sifatida ko‘rib chiqishni so‘ragan. Maktubda “Tanqidchilar mening ijromni yuqori baholashgan, ammo men “Eng yaxshi aktyor” nominatsiyasiga loyiq emasligimni eshitib, juda xafa bo‘ldim.
Go‘yo kimdir bog‘ichimni tortib olgandek” deb yozilgan. Mualliflar shuningdek, “Oq so‘yloq”, “Erkin Villi”, “Kichkintoy”, “Qushlar” va “Urush oti” kabi filmlarda hayvonlarning kino tarixida muhim rol o‘ynaganini ta’kidladilar.
Ularning fikricha, hayvon aktyorlar ko‘pincha butun hissiy yukni va film franshizasining asosiy ruhini ko‘tarib kelgan. Film syujeti Todd ismli yigit va uning sodiq iti Indi atrofida qurilgan.
Yigit bobosidan qolgan qishloq uyiga ko‘chib o‘tadi, ammo bu yerda g‘ayrioddiy mavjudotlar va ruhlar yashaydi. Indi esa egasini ushbu tahdidlardan himoya qilish uchun qahramonlik ko‘rsatadi.
Qo‘rqinchli filmning bosh rolini rejissyor Ben Leonbergning o‘zi tarbiyalagan it – Indi ijro etgan. “Itning nigohi bilan” filmi Rossiyada 16 oktyabrda premerasi bo‘lib o‘tadi.
